பெண் சுதந்திரம்

70ஆண்டு கால சுதந்திர இந்தியாவில் பெண்களுக்கு பாதுகாப்பு இல்லை என்பது நிச்சயம் ஒத்துக்கொள்ளவேண்டிய ஒன்று. இரவு பத்துமணிக்கு மேல் தனியாக ஒரு பெண் நடந்து செல்வது எவ்வளவு ஆபத்தானது என்பது விளக்க இயலாது.
தெரு, சந்துகளில் தான் பெரும்பாலும் வன்புணர்ச்சிகள் இடம்பெறுகிறது. CCTV camera இருந்ததால் இது போன்ற சம்பவம் நடந்தது அனைவருக்கும் தெரிய வந்தது, இல்லையேல் எப்படி இந்த நிகழ்வு நடந்தது புலப்பட்டிருக்கும்? அப்படியெல் இது போன்று கண்காணிக்காமல் எத்தனை நிகழ்வு நடந்திருக்கும்?
கடவுள் போன்று அனைத்து இடங்களிலும் காவலர்கள் கண்காணிக்கவியலாது உண்மை தான், ஆனால் நவயுக கடவுளான CCTV cameraவை முடிந்த வரை இதுபோன்ற இடங்களில் பொருத்தலாம்.

இவை அனைத்தும் தற்காப்பு முறையே, ஆனால் இது போன்ற சம்பவங்கள் நிகழாமல் இருக்க என்ன வழி? சில மாதங்களுக்கு முன்பு சவுதி அரேபியாவில் இளவரசர் Turki Bin Saud Al-Kabirக்கு நிகழ்ந்தது நினைவிருக்கலாம். தண்டனைகள் தான் குற்றங்களை குறைக்கும் என்பது என் கருத்து.

Digital நாடகம்

#Demonetization எவ்வளவு சிறப்பான திட்டம்.
500, 1000 ரூபாய் நோட்டுகள் செல்லாது என்றவுடன் வேக வேகமாக வரிசையில் நின்று தங்களிடம் இருந்த பழைய நோட்டுகளை மாற்றியவர்கள் யார் தெரியுமா?
இந்நாட்டின் ஏழைகளான அம்பானி, ரத்தன் டாட்டா, அதானி, குமார் பிர்லா, பொன்னவாளா, மிட்டல், ஷிவ் நாடார், பலோன்ஜி, ஆசிம் பிரேம்ஜி, திலிப் ஷங்க்வி, அமிதாப், ரஜினி (ஏன் எதற்கெடுத்தாலும் ரஜினியை உள்ளே இழுக்கிறீர்கள், அவர் என்னதான் செய்தார்? என்று யாராவது என்னை கேளுங்களேன்) இன்னபிற பழம்பெரும் சில்லறைகள்.

மற்றபடி விவசாயம் செய்யும் அன்றாட கூலிகளுக்கு, புதிய நோட்டுகள் அவர்கள் வீடுதேடி கட்டுக்கட்டாக குளியலறைக்கே வந்துவிட்டது.

2000 ரூபாய் நோட்டுகள் வங்கிகளுக்குக்கே அதிகம் வரவில்லை, ஆனால் அதற்குள் Big Bazaar தன்னிடம் 2000 ரூபாய் உள்ளதென்றும் மக்கள் பெற்றுக்கொள்ளலாம் என்றும், SnapDeal வாடிக்கையாளர்கள் 2000 ரூபாய் நோட்டுகளை order செய்து கொள்ளலாம் அதற்கு 1 ரூபாய் service charge எடுத்துக்கொள்வோம் எனவும் அறிவிக்கின்றனர்.

வங்கிகள் செய்யவேண்டிய வேலையை செய்ய இவர்கள் யார்? இவர்களுக்கு எப்படி 2000 ரூபாய் நோட்டுகள் வந்தது? யார் கொடுத்தது இவர்களுக்கு?
இந்தியாவில் பிழைக்க corporateட்டாக இருக்க வேண்டும். விவசாயியாகவோ தினக்கூலியாகவோ இருந்தால் விடை உங்களுக்கே தெரியும்.. வாழ்க ஜனநாயகம்.

கீச்சுலகம்

குழந்தை:
சிலேட்டின் மூலையில் அருவி வரைய தொடங்கிய குழந்தை, நான்கு கோணத்துக்குள் முடிக்கவியலாமல் இருக்கை வரை நீட்டித்தது. சரி தானே

வழிப்போக்கன்:
அழைபேசியில் ஒருவர் கோபத்துடன் பேசிக்கொண்டிருக்கிறார் என்பது புரிகிறது, ஆனால் ஆட்காட்டி விரல் நீட்டி யாரை எச்சரிக்கிறார்?

கடவுள்:
கடவுளை அன்றாடம் கடக்கும் ஒரு வழிப்போக்கனாக கடந்துவிடுங்கள், இல்லையேல் உறவாடி பூஜையறை வரை வந்துவிடுவான்.

காதல்:
இந்த இடம் நினைவிருக்கிறதா? என்றாள் *//அவ்விடத்தின் நினைவுகளை விட்டு நீங்கினால்தானே மறக்கவியலும்?//*
இல்லை என்றேன்.

வாழ்க்கை:
விமர்சனங்களுக்கு பயந்தவர்களின் பெயர்கள் எவ்வரலாற்றிலுமே இடம்பெறவில்லை.

பயணம்:
தன்னியல்பை தொலைப்பவர்க்கே பயணப்படுதல் வரமாகும், ஏனையோர்க்கு பிழைப்பிற்கான இடம்பெயர்தல்

உலகசினிமா ஓர் பார்வை - Baraka

Baraka - ஆவணப்படம்

ரான் பிரிக்கி இயக்கிய ஆவணப் பேசும் படம். ஹாப்பி மொழியிலிருந்து தழுவப்பட்ட Qatsi(Life) எனும் சொல்லை இது போன்ற படங்களுக்கு சூட்டுகின்றனர். இதற்கு முன் வெளிவந்த Koyaanisqatsi படத்தின் தாக்கத்தை இப்படத்தில் வெகுவாக காணலாம். 70 mm திரைச்சுருளில், 8000UHD பகுத்தலில் உருவான படம். மெதுவாக இயங்கக்கூடிய(slow-motion), காலம் கழிந்த(time-lapse) முறையில் சில காட்சிகள் படமாக்கப்பட்டுள்ளன.
படத்தில் பெரும்பாலும் புனித வழிபாட்டு இடங்கள், வரலாற்றில் சிதைந்த இடங்கள், பல்வேறு பழங்குடி இனத்தின் சடங்குகள் பெருமபான்மையாக கவரப்பட்டுள்ளன, மேலும் சில இயற்கையே உருவான அருவிகள், ஏரிகள் மற்றும் மழைக்காடுகள் கவரப்பட்டுள்ளன.

23 நாடுகளில் 153 இடங்களில் காட்சியமைக்கப்பட்டுள்ளது இப்படம். இவற்றில் பின்வருவன என்னை வெகுவாக பாதித்தவை.

வரலாற்றில் சிறந்த அங்கூர் வாட், வாரணாசி ஈமச்சடங்கு, கெச்சக் எனப்படும் பர்மிய நடனம், கென்ய பழங்குடி இனத்தின் மாசாய் நடனம், பிரேசில் பழங்குடியினரின் காயாபோ நடனம், ஆஸ்திரேலிய தீவான பத்துர்ஸ்ட், இதில் வசிக்கும் டிவி பழங்குடி இனத்தவரின் ஈமச்சடங்கு நடனம்.

அமெரிக்காவில் பார்க்-அவென்யூவின் சமிக்ஞையில் போக்குவரத்தை பதிவு செய்த விதம் இப்படத்தின் படமாக்கலின் மையத்தை உணர்த்துகிறது.

பிரேசில் மலைக்காடுகளில் அறுபடும் ஒற்றை மரம் என் உணர்வுகளை சற்றே அசைத்துப்பார்த்தது. குப்பை பொறுக்கும் வங்காள மக்கள், டான்சானியாவின் நார்ட்டன் ஏரியில் கவிழ்த்துக்கிடந்த வானம்,  வீடில்லாத மக்கள், குவின் எனப்படும் சீன பேரரசின் டெரகோட்டா போர் படையின் சிலைகள், ஈரானின் பெர்சிபோலிஸ் கல் சாம்ராஜ்யம் என நம் வாழ்க்கை முறையின் சமநிலையற்ற நிலையையும், வரலாற்றின் நிரந்தரமற்ற நிலையையும் மனதில் வேரூன்றுகிறது. படத்தில் காண்பித்தவைகளுக்கென்று தனியொரு படமே எடுக்கலாம்.
# RonFricke 

குழந்தை வைத்திருப்பவன்!!

குழந்தைகள் என்றால் அனைவருக்குமே விருப்பம், அதில் எவ்வித மாற்றுக்கருத்தும் இல்லை, சில பல முசுடுகளைத் தவிர. அக்குழந்தையை வைத்திருப்பவர்கள் மீது ஒருவித ஈர்ப்பும், பரிதாபமும், ஆசையும் ஒரு சேர தொற்றிக்கொள்கிறது.

குழந்தையின் மொழியை உடனே தெரிந்துக்கொண்டது போன்ற உணர்வாகவும் இருக்கலாம் அக்குழந்தையை நெருங்குவதற்கு. உண்மையில் குழந்தையின் மொழிதான் உலகில் மிகக் கடினமான மொழி, சில சமயம் அம்மாவிற்கும் கூட புரியாது போகும்.

அழும் குழந்தைக்கு பல வேடிக்கை காட்டுகிறார் அதற்குமுன் பரிச்சயப்படாத ஒருவர். அவர் தன் வீட்டில் ஒரு சிடுமூச்சியாக, எதற்கெடுத்தாலும் எரிந்து விழுகிற ஆளாக கூட இருக்கலாம். ஆனால் அழும் அக்குழந்தை முன்பு தன் இயல்புகளை தொலைத்து வேடிக்கை காட்டுகிறார். முகத்தை சிரித்தாற் போல் வைக்கிறார், கையில் சொடக்கிட்டு விசேட ஒலி எழுப்புகிறார், கன்னத்தை குவித்து பயமூட்டுகிறார், பெற்றோரிடம் வாங்கி சமாதான படுத்துகிறார்.

திருமணமாகாமல் பேருந்திலோ, ரயிலிலோ முன் பதிவு செய்த இருக்கையை கூட விட்டுக்கொடுக்க சொல்கிறார்கள், ஆனால் கைக்குழந்தையை வைத்திருப்பவனை மதிக்கிறார்கள், தானே முன்வந்து இருக்கையை தருகிறார்கள்.

அப்படி என்ன உள்ளது இந்த குழந்தையிடம்? சிறிது நேரம் உடனிருந்தால் மனவேதனையை மறக்கடிக்கிறது, அலங்காரம் ஏதுமின்றி அனைவரையும் ஈர்க்கிறது, எவ்வளவு இறுக்கமான நாளின் நேரத்தையும் கடத்துகிறது, தன் சிரிப்பின் மூலம் ஆசிர்வதிக்கிறது.

ஏதும் அறியாத, அப்பழுக்கற்ற, கவலைகள் இல்லா உள்ளம் என்பதால் அனைவரிடமும் எளிதாக பழக முடிகிறது போலும், வயதான பின்னும் இப்படியே இருந்துவிட்டால் எவ்வளவு நன்றாக இருக்கும். என்றுமே குழந்தையாக இருந்துவிட முடியாதே!

பெண் எனுமோர் மாமருந்து!!

பெண்களைப் போற்றாத, புகழாத கவிஞர்கள் எழுத்தாளர்கள் இதுவரை இருந்ததில்லை, இனி இருக்கப்போவதுமில்லை. இதற்கான காரணம் எதிர்பாலின் மீதுள்ள ஈர்ப்பே, அதுவே நம்மை வாழ உந்துகிறது. ஆனால் இலக்கியங்களுள் பெரும்பான்மையானவை யுவதிகளையே புகழ்ந்து போற்றப்பட்டு வந்திருக்கிறது, ஆணை புகழ்ந்தோ வர்ணித்தோ வெளிவந்த படைப்புகளை விரல்விட்டு எண்ணிவிடலாம்.

இங்கே அப்படி சிலவற்றை வர்ணித்துள்ளேன்.

வெளியே நின்று ஒரு பெண் அழுகிறாள். இவ்வளவு அழகான பெண்ணைக்கூட கஷ்டப்படுத்தி வேதனை கொள்ள வைப்பது யார்?

ஒரு பெண் தரும் முத்தத்திற்கு ஈடு, இன்னொரு பெண் தரும் முத்தம்.

இரவிற்கான தனிமை, தனிமைக்கான பெண். நான் மட்டும் பரவும் நிழலில் அவ்விரவின் உரிமைக்காக போராடிக்கொண்டிருக்கிறேன்.

பட்டியிலிருந்து விடுபட்ட ஆடுகளின் மனநிலையை ஒத்ததாய் கட்டற்ற சிந்தனையில் லயிக்கிறது பெண்ணைப் பற்றிய ஆணின் வர்ணனைகள்.

ஒரு பெண் உன் முன் கூச்சமின்றி அழத்தொடங்கிவிட்டால் அவள் மனதில் நீ நிரந்தர இடம் பிடித்துவிட்டாய் எனப் பொருள்.

போதைகள் என்று தனியே ஏதும் இல்லை, பழகும் அனைத்தும் போதையே. தலையாயது பெண்.

ஆண் தன்னை பார்க்கிறான் என தெரிந்ததும் காதோரம் உள்ள முடியை சரி செய்வது போல் அவனை ஓரக்கண்ணால் பார்க்கும் பெண் வாழ்வை அழகாக்கிச் செல்கிறாள்.

இவ்வளவு காதல் கவிதைகளையும் தீண்டல்களையும் ஆண் பெண்ணிடமோ பெண் ஆணிடமோ நிஜ வாழ்க்கையில் எதிர்பார்ப்பது தவறு.

ஏதோ ஒரு வக்கிரத்தை கொட்டித் தீர்க்கும் உறவின் எல்லையாய் உள்ளது பலருக்கு பெண் நட்பு.

தோன்றும் வக்கிரங்களை அவன் காதில் கிசுகிசுக்கிறாள், "பெண்கள் ஒருபோதும் சளைத்தவர்கள் அல்ல" என அடிக்கடி அவள் சொல்வதை நினைவுகூர்கிறான்.

பெண்கள் ஒப்பனை இல்லாமல் வெளியில் வந்தால், ஆணின் ரசனை மாறத்தொடங்குமோ என்னவோ.

படியவாரி பூச்சூடிய பெண்கள் ஒரு வகை அழகென்றால், காற்றிலலையும் குதிரைவால்கள் இன்னொரு வகை அழகு.

பெண்கள் தங்கள் தோழிகள் மீதும் சுயநலமாகத்தான் உள்ளனர்

நான் கண்ட உலக சினிமா ஒரு பார்வை !!

கலை எப்போதுமே ஒரு மனிதனை பரவசத்தில் ஆழ்த்தக்கூடியது. யதார்த்தத்தின் வேர்கள் முழுதும் பரவிக்கிடக்கிறது என்பதால் எனக்கு மிக நெருக்கம், அக்கலைகளுள் கூத்து இன்னும் நெருக்கம். எளிதாய் காணக்கிடைக்கிறது என்பதாலோ என்னவோ கூத்தின் நவநாகரிக பதிப்பான சினிமாதான் தற்போது என் தற்காலிகக் கூடாரம்.
சினிமா என்றதும் உங்கள் அபிமான நாயகர்களை கனவில் கொல்லாதீர்கள், இது முழுக்க முழுக்க யதார்த்த சினிமா, நான் கண்ட உலக சினிமா ஒரு பார்வை.

இங்கே எதையும் நான் ஒன்று இரண்டு என வரிசைப்படுத்தவில்லை...

1. Timbuktu

Mauritanian மொழியில் வெளிவந்த படம். வடக்கு ஆப்ரிக்க பாலைவனமாக்கலை, சுதந்திரம், வறுமை, தீவிரவாதம், கட்டுப்பாடு அனைத்தும் ஒருசேர தந்துள்ளனர். சந்தேகமே வேண்டாம் நாம் வாழும் வாழ்க்கை கொடுத்துவைக்கப்பட்டது, சுதந்திரத்தின் வலி இதுதான் என உணரவைக்கக்கூடிய படம்.

2. Relatos Salvajes

Spanish மொழியில் ஆறு சிறு கதைகளாய் வெவ்வேறு களங்களில் பல்வேறு கலைஞர்களை வைத்து அமர்க்களப் படுத்தியிருக்கிறார்கள்.

3. Carandiru

 Estação Carandiru புத்தகத்தை வைத்து வெளிவந்த Brazil மொழி படம். 1992ல் 111 சிறைக்கைதிகள் படுகொலை செய்யப்பட்டதை பற்றி அலசும் ஒரு படம்.

4. Embrace of the Serpent

Spanish மொழி படம். அமேசான் காட்டின் செல்வங்களை சுரண்டுவதை பற்றியும், நாகரீகமயமாக்கல் எவ்வாறு இயற்கையை விட்டு வெகுதூரத்திற்கும், பிறப்புரிமை மற்றும் தன் உரிமைகள் தொலைவது பற்றியும் அலசுகிறது.

5. Failan

Korean சினிமா. ஜப்பானிய Jirō Asada புத்தகத்தின் தழுவல் இப்படம். காதல் தானாக அமையும் யதார்த்தம் அழகு.

6. Heidi

Swiss-German மொழியின் கலவையில் வெளிவந்துள்ளது. ஆல்ப்ஸ் மலைத்தொடர்கள், அந்த குழந்தையும் அவரது ஆடு மேய்க்கும் தாத்தாவையும் பற்றிய தரமான ஒரு படம்.

7. Le Gamin au vélo

தந்தையால் கைவிடப்பட்டு நட்புக்காக ஒரு பெண்ணை தேர்ந்தெடுக்கும் சிறுவனைப் பற்றிய French மொழி படம்.

8. The Last Station

Leo Tolstoyயின் வாழ்க்கை வரலாற்றின் ஒரு தொகுப்பு. அவரது கடைசி நாட்களை படமாக்கியுள்ளனர். The Last Station புத்தகத்தின் தழுவலே இப்படம்.

9. La Jetée

கால பயணம் பற்றிய விஞ்சானத்தை அடிப்படையாக வைத்து வெளிவந்த French/German மொழி படம். பின்னாளில் இப்படத்தை மையமாக வைத்து வெளிவந்த படங்கள் ஏராளம்.

10. Diarios De Motocicleta

Spanish மொழி படம். சேகுவேராவின் வாழ்க்கையின் ஒரு தொகுப்பு இப்படம், அவர் இளம் வயதில் அவர் மேற்கொண்ட பயணம் பற்றிய படம். இப்படத்தை பார்த்து இதே போல் பயணம் செய்ய வேண்டும் என்ற எண்ணம் மேலோங்கும்.